طبعا باحلم اتجوز بس باحلم اكتر بابن يقولى بابا بالتحديد بابا حامد
انا شايف حلمي بالتفصيل
باحلم بابنى يمسكنى من ايدي ويقولي بابا بابا عشان خاطري تعالى معايا اتفرج علي وانا بالعب كورة وياخد ايدي ويشدني معاه وافضل اتفرج عليه واشاور له وهو بيلعب وبعد مايخلص انزل على الارض وافتحله دراعي وهو ييجي من بعيد ياخدها جري ويفتح دراعه ويبقى اقوى وأكبر حضن في التاريخ
انا شايف حلمي بالتفصيل
باحلم انه كسر طبق لانه لازم يكسر طبق ويتوقع ان انا ازعقله واقرب منه وبعدها اخده في حضني وهو خايف الفه بدراعي واضمه وابوس دماغه واقوله ولا يهمك ياحبيبي بس خللى بالك المرة الجاية فيلاقيني باعامله بحب اوى مش زي الاباء التانيين فتطلع من بقه ياااااااااااااه هو ليه الناس كلها مش زي بابا كده كان زمان كل الناس مبسوطة زيي
باحلم بابنى رافع راسه لفوق لفوق اوى اوي وفاتح صدره وبيقول بكل فخر بابا احسن اب في الدنيا ده انا بابا علمني سواقة العجل والكمبيوتر وحفظني قرءان وكان كل يوم يفسر لنا ايه على الغداء وكان بياخدني معاه الجامع وكان بيديني فلوس عشان اتبرع لفقراء كل شهر وكان بياخدني نجيب بطاطين لهم في الشتاء وكان وكان وكان
باحلم اني بعد ما اموت الاقي حسنات جاية لي من الهواء واقول يارب دي منين الحسنات دي يتقالي ده ابنك باعتهالك قرا قرءان ووهبك ثوابه زي ما انت كنت بتقرا قرءان وتهب ثوابه لابوك والجزاء من جنس العمل
باحلم اني اروح اتعاهد انا وابني اقوله بجد بجد اوي بكلام يثير كل ذرة حماس فيه تعاهدني يابنى تكون افضل واحد في الدنيا تكون احسن من كل صحابك مايبقاش في حد احسن منك وتعمل كل اللي تقدر عليه مايعديش اسبوع من غير ماتنافس افضل واحد شافته عنيك ولازم تكسبه مابينك وما بين نفسك فيحط ايده الصغيرة خالص في ايدي ويقول لي بكل حماس الدنيا اعاهدك يابابا فاحس بفرحة اوي
اي نعم الايد اللي بتسلم علي صغير بس بصراحة ايد راجل
باحلم بان ابني بيسمع كلامي من قبل حتى ما اقوله ومن غير ما اقوله كمان اصل انا قدوة وباعرفه انا باعمل كل حاجة ليه
باحلم بكل ده في الجنة اصل الحقيقة حتبقى غير كده خالص
حاكمل بكرة ان شاء الله
استاذنكم دلوقتى
